ढोरपाटन बाढीपहिरो : ११ जनाको शव भेटियो, ३० बढी बेपत्ता

कमल पौडेल,बागलुङ

ढोरपाटन नगरपालिकामा बुधबार राति गएको बाढीपहिरोमा बेपत्ता भएकामध्ये ११ जनाको शव फेला परेको छ ।

गए राति परेको अविरल वर्षाको कारण ढोरपाटन नगरपालिका वडा नं. ८ र ९ भूजिखोलाको शिर देउरालीमा ठुलो पहिरो जाँदा ३१ भन्दा बढी घरमा पूर्ण क्षति भएको छ भने ३० जना भन्दा बढी बेपत्ता भएका छन् ।

ढोरपाटन उपत्यका छिर्ने नाका देउराली भन्ने स्थानमा पहिरो गएको हो । देउराली भुजी खोलाको मुहान पर्दछ । सोही स्थानवाट पहिरोले भुजिखोला किनारका वस्ती वगाउँदै झरेको हो। त्यहाँ वगाएका शवहरू ४५ किलोमिटर तल पनि भेटिएका छन् ।

बागलुङ कै ढोरपाटन नगरपालिकाको विभिन्न भाग, बडिगाड गाउँपालिकाको विभिन्न भाग र गुल्मीको मुसिकोट नगरपालिकाका केही स्थानमा समेत शव भेटिरहेको बताइएको छ ।अहिलेसम्म ढोरपाटन नगरपालिका वडा नं. ९ को वर्ष २६ को केशमाया विकको शव पहिचान भएको जिल्ला प्रहरी कार्यालयका प्रहरी नायव उपरीक्षक राजेन्द्र रेग्मीले जानकारी दिनुभएको छ । ४ जना घाइतेको उद्धार गरिएको छ ।बाढीले लाकुरीबोटमा १५ घर, दुनेपधेरामा ५ घर, घट्टबोटमा ८ घर, भुसुन्डेमा १ घर, बगाएको छ ।

सुकुरदुङको सरस्वती आधारभूत विद्यालय, सुप्राङको जनचेतना प्रावि समेत बगाएको छ । साबिक बोवाङमा रहेको ३ वटा जलविद्युत योजना, ३ वटा झोलुङ्गे पुल पनि बगाएको छ । अहिले उद्धार र क्षतिको विवरण सङ्कलन भइरहेको घटना स्थलमा रहनुभएका इलाका प्रहरी कार्यालय बुर्तिवाङका प्रमुख प्रहरी निरीक्षक प्रकाश सिंह भण्डारीले जानकारी दिनुभएको छ ।